傍友，賢妻

原自國語歌曲 泥娃娃

作詞：羅寶生
作曲：姚敏
合唱：森森‧杜平

(男白) 開門。
(女白) 邊個呀？
(男白) 重駛問嘅？梗系我啦。
(女白) 唉！將近天光嗱。
(男白) 嚇！番親嚟你一定要教訓我噃。
(女白) 唔係叫做教訓，不過見你晚晚都咁夜番，驚你挨壞唧。
(男白) 壞都冇法咖，揾食噃。
(女白) 要你咁辛苦，我點過得意呢？唉，你靠傍闊佬養家，
唔係辦法嘅。
(男白) 哦！我傍到家肥屋潤都唔好？咁你要我點做至啱呀？

(男唱)
我成日傍個茅根竹，佢認我做心腹，佢大把身家好色好食，
真歡喜作局。
我成日傍個茅根竹，食著甚充足，樣樣都黐，藉水最易，
全憑架步熟。
傍老細，要說話靈活，擅吹捧，作狀純服，
托拍功夫早已做齊，靠滾更純熟，
我賢內助，你唔知足，夜夜重兜督，未知我辛苦借錢過活，
你為人似舊木。

(女白) 唉！總之我唔希望你靠茅根竹，藉水過日子啦。
(男白) 唉！我都知，不過冇錢冇辦法呀嘛。
(女白) 我唔係要你一朝發達，我想你用雙手，用腦筋，
切切實實從頭做起，咁樣做人先至啱咖嘛。
(男白) 啱就啱，不過唔知做乜野好呢？
(女白) 呢個問題慢慢想啦！最緊要你肯改過先至得。
(男白) 咁呀。

(女唱)
你傍闊少，你做奴僕，做跟班，更受凌辱，靠借錢易趨向下流，
更憂心你隨俗，你求自立，宜知足，我願日日食餐粥。

(合唱)
共刻苦耐勞，兩夫妻努力，勤勞挽大局。

(女白) 希望你浪子回頭金不換就好啦。
(男白) 唉！有個咁好嘅賢妻，精神感召，我都應該要改過嘅。
(女白) 咁就不枉我對你一番苦心咯。