馨滿義竹

作詞：嚴詠能
作曲：嚴詠能
編曲：趙家駒

一陣一陣ㄟ甘蔗香吹入來老車站
月台看沒你一人心頭柔柔也重
我知影鄉親真不甘不甘將伊來放
異鄉走唱ㄟ少年郎將故事擱率入站

火車火車頭犁犁酷酷嗽過八掌溪
女兒欲嫁不過溪財產不留外家

一籠一籠ㄟ魚跟蝦鮮鮮欲見天地
學生囝仔困沒飽書包抓著跳上車
阿母有甲帶便當乎出外囝仔有力量
五分車款款也駛幸福隨這來起蹦

心滿意足馨滿義竹
載著歸車ㄟ老感情感謝一路有你來牽成
心滿意足馨滿義竹
小漢時辰彼班老火車現在要駛返頭擱欲陪咱到老

一陣一陣ㄟ甘蔗香吹入來老車站
月台今仔攏是人牽手散步來開講
我看著鄉親全振動為著咱故鄉ㄟ夢
異鄉走唱ㄟ少年郎愈唱愈輕鬆

--------- ---------------------------------

12797/《馨滿義竹》Hing Buán Gī -tik
嚴詠能Giâm Īng-lîng

一陣一陣仔的甘蔗芳
tsi̍t-tsūn-tsi̍t-tsūn-á ê kam-tsià phang
吹入來老車站
tshue ji̍p-lâi lāu tshia-tsām

月台看無你一人
gua̍t-tâi khuànn-bô lí tsi̍t-lâng
心頭聊聊仔重
sim-thâu liâu-liâu -á tāng
阮知影鄉親真毋甘
gún tsai-iánn hiong-tshin tsin m̄-kam
毋甘將伊來放
m̄-kam tsiong i lâi pàng
異鄉走唱的少年人
ī-hiong tsáu-tshiò ê siàu-liân-lâng
將故事閣𤆬入站
tsiong kòo-sū koh tshuā ji̍p tsām

火車火車頭犁犁
hué-tshia hué-tshia thâu lê-lê
呿呿嗽過八掌溪
khuh-khuh-sàu kuè Pat-tsiáng-khe
查某囝欲嫁無過溪
tsa -bóo-kiánn beh kè bô kuè-khe
財產無留外家
tsâi-sán bô lâu guā-ke

一籠一籠的魚佮蝦
tsi̍t-láng tsi̍t -láng ê hî kah hê
鮮鮮欲見天地
tshinn-tshinn beh kìnn thinn-tē
學生囡仔困未飽
ha̍k-sing-gín-á khùn buē pá
書包捎咧跳上車
tsu-pau sa--leh thiàu tsiūnn-tshia
阿母有共扎便當
a-bú ū kā tsah piān-tong
予出外囡仔有力量
hōo tshut-guā gín-á ū li̍k-liōng
五分仔車寬寬仔駛
gōo-hun-á-tshia khuann-khuann-á sái
幸福對遮來起磅
hīng-hok tuì tsia lâi khí-pōng

心滿意足
sim buán ì tsiok
馨滿義竹
hing buán Gī-tik
載著規車的老感情
tsài tio̍h kui tshia ê lāu kám-tsîng
感謝一路有你來牽成
kám-siā tsi̍t-lōo ū lí lâi khan-sîng
心滿意足
sim buán ì tsiok
馨滿義竹
hing buán Gī-tik
細漢時陣
sè-hàn sî-tsūn
彼幫老火車
hit pang lāu hué-tshia
這馬欲駛翻頭
tsit-má beh sái huan-thâu
閣欲陪咱到老
koh beh puê lán kàu lāu

一陣一陣的甘蔗芳
tsi̍t-tsūn-tsi̍t-tsūn ê kam-tsià phang
吹入來老車站
tshue ji̍p-lâi lāu tshia-tsām
月台這馬攏是人
gua̍t-tâi tsit-má lóng-sī lâng
牽手散步來開講
khan-tshiú sàn-pōo lâi khai-káng
阮看著鄉親齊振動
gún khuànn-tio̍h hiong-tshin tsiâu tín-tāng
為著咱故鄉的夢
uī-tio̍h lán kòo-hiong ê bāng
異鄉走唱的少年人
ī-hiong tsáu-tshiò ê siàu-liân-lâng
那唱那輕鬆
ná tshiò ná khin-sang

心滿意足
sim buán ì tsiok
馨滿義竹
hing buán Gī-tik
載著規車的老感情
tsài tio̍h kui tshia ê lāu kám-tsîng
感謝一路有你來牽成
kám-siā tsi̍t-lōo ū lí lâi khan-sîng
心滿意足
sim buán ì tsiok
馨滿義竹
hing buán Gī-tik
細漢時陣
sè-hàn sî-tsūn
彼幫老火車
hit pang lāu hué-tshia
這馬欲駛翻頭
tsit-má beh sái huan-thâu
閣欲陪咱到老
koh beh puê lán kàu lāu