海岸悲歌

今阿日下埔來到彰化海邊日頭炎炎照著阮ㄟ面
酸酸的海風穿入阮的耳是不是海洋要向我來哭悲情

到底是發生什麼大代志海底的魚仔隴總走去躲
海邊的鳥仔哭都哭不停聽說是阿國仔要來搶地做生意

海邊駛牛車的歐吉桑飼蚵仔做食已經五六十冬
他說土地是母親請你勿通買賣大自然的生命要留給子孫仔來生活

阿~你咁知影是這片土地來尬咱晟
阿~你咁知影是這片海洋來飼咱台灣

創造經濟奇蹟的企業大財團請你珍惜美麗formosa
高高在上的政府大官請你走出京城真足聽

農民的心聲漁民的心聲子孫仔的心聲請你真足聽
土地的心聲山嶺的心聲海水的心聲你咁有咧聽
鳥仔的心聲魚仔的心聲海豬仔的心聲

請你向天向地請你詳細來聽這都不是咱人可以得到的一切

-------------- ----------------------------

《海岸悲歌》Hái-huānn Pi-kua
農村武裝青年樂團Lông-tshuan Bú-tsong Tshing-liân Ga̍k-thuân
主唱：阿達A-ta̍t (江育達Kang Io̍k-ta̍t)

今仔日下晡
kin-á-ji̍t ē- poo
來到彰化海邊
lâi-kàu Tsiong-huà hái-pinn
日頭炎炎
ji̍t-thâu iām-iām
照著阮的面
tsiò tio̍h gún ê bīn
酸酸的海風
sng-sng ê hái-hong
穿佇阮的耳
tshng tī gún ê hīnn
是毋是海洋
sī-m̄-sī hái -iûnn
欲向阮來訴悲情
beh hiòng gún lâi sòo pi-tsîng

到底是發生著
tàu-té sī huat-sing tio̍h
啥物大代志
siánn-mih tuā tāi-tsì
海底的魚仔
hái-té ê hî-á
是攏總走去覕
sī lóng-tsóng tsáu-khì bih
海邊的鳥仔
hái-pinn ê tsiáu-á
是吼攏吼袂停
sī háu lóng háu buē thîng
聽講是阿國仔
thiann-kóng sī A-kok --á
欲來搶地做生理
beh lâi tshiúnn tē tsò-sing-lí

海邊駛牛車的歐吉桑
hái-pinn sái gû-tshia ê oo -jí-sáng
飼蚵仔作穡
tshī ô-á tsoh-sit
已經五六十冬
í-king gōo-la̍k-tsa̍p tang
伊講土地是母親
i kóng thóo-tē sī bú-tshin
請你毋通買賣
tshiánn lí m̄-thang bé-bē
大自然的性命
tāi-tsū-jiân ê sìnn-miā
欲留予囝孫仔來生活
beh lâu hōo kiánn-sun-á lâi sing-ua̍h

啊~你敢知影
ah~ lí kám tsai-iánn
是這片土地
sī tsit phìnn thóo-tē
來共咱晟
lâi kā lán tshiânn
啊~你敢知影
ah~ lí kám tsai-iánn
是這片海洋
sī tsit phìnn hái-iûnn
來飼咱台灣
lâi tshī lán Tâi-uân

創造經濟奇蹟的
tshòng-tsō king-tsè kî-tsik ê
企業大財團
khì-gia̍p tuā tsâi-thuân
請你珍惜美麗Formosa
tshiánn lí tin-sioh bí-lē Formosa
高高在上的
ko-ko tsāi-siōng ê
政府大官
tsìng-hú tuā-kuann
請你行出京城
tshiánn lí kiânn tshut kiann-siânn
斟酌聽
tsim-tsiok thiann

農民的心聲
lông-bîn ê sim-siann
漁民的心聲
hî-bîn ê sim-siann
囝孫仔的心聲
kiánn-sun-á ê sim-siann
請你斟酌聽
tshiánn lí tsim-tsiok thiann

土地的心聲
thóo-tē ê sim-siann
山嶺的心聲
suann-niá ê sim-siann
海水的心聲
hái-tsuí ê sim -siann
你敢有咧聽
lí kám ū leh thiann
鳥仔的心聲
tsiáu-á ê sim-siann
魚仔的心聲
hî-á ê sim -siann
海豬仔的心聲
hái-ti-á ê sim-siann
---

請你向天向地
tshiánn lí hiòng thinn hiòng tē
請你詳細來聽
tshiánn lí siông-sè lâi thiann

這攏毋是咱人
tse lóng m̄-sī lán-lâng
會當得著的一切
ē-tàng tit-tio̍h ê it-tshè